വന്നു കുടുങ്ങിയവര്‍

jamaathe islami എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ
jamaathe islami എന്ന ലേബല്‍ ഉള്ള പോസ്റ്റുകള്‍ കാണിക്കുന്നു. എല്ലാ പോസ്റ്റുകളും കാണിക്കൂ

2012 ജനുവരി 17

മുസ്ലിമാകാന്‍ തന്നെ പണി..മുസ്ലിമായാലും പണി..

മതസംഘടനകളുടെയും, രാഷ്ട്രീയപാര്ട്ടികളുടെയും ഒക്കെ അരമന രഹസ്യങ്ങള്‍ ചോര്‍ത്തുന്ന പണി നമ്മള്‍ മാധ്യമങ്ങള്‍ക്ക് വിട്ടു കൊടുത്തതാണല്ലോ, അത്യാധുനിക രഹസ്യ ചിപ്പുകളും മറ്റും ഉപയോഗിച്ചു അവര്‍ അവരുടെ ചാരപ്പണി കൂടുതല്‍ സക്രിയമാക്കുമ്പോഴാണ് നമ്മുടെ പോലീസ് ഏമാന്മാര്‍ കേരളത്തിലെ ഏതാനും മുസ്ലിം നേതാക്കന്മാരുടെ  മാത്രം ഇമെയില്‍ വിവരങ്ങള്‍ ചോര്‍ത്താന്‍ ഏര്‍പ്പാടാക്കിയിരിക്കുന്നത്...ഇവര്‍ മുസ്ലിംകളാണോ, സുന്നത്ത് കഴിച്ചിട്ടുണ്ടോ എന്നൊക്കെ നോക്കാനാണ് ഈ ആഭ്യന്തര വകുപ്പിന്റെ ഇടപെടലെന്നു കരുതിയാല്‍ തെറ്റി. തിരുവനന്തപുരത്തെ സെക്രെട്ടരിയെട്ടില്‍ ഇടതന്‍ വന്നാലും, വലതന്‍ വന്നാലും നമ്മുടെ പോലീസ് വകുപ്പിലെ ഏമാന്മാരുടെ നിറം മാറില്ലല്ലോ..സാക്ഷാല്‍ പാണക്കാട് തങ്ങള്‍ തന്നെ ആഭ്യന്തര മന്ത്രിയായാലും ഈ പോലീസില്‍ നിന്നും ഇങ്ങനെയൊക്കെയേ പ്രതീക്ഷിക്കാവൂ..

മൂത്ത പണക്കാരന്‍ പിവി അബ്ദുല്‍ വഹാബിന്റെ മുതല്‍ പുതിയ എഴുത്തുകാരന്‍ സി ദാവൂദിന്റെ വരെ ഈ മെയിലുകള്‍ ഇങ്ങനെ ചോര്‍ത്താന്‍ ആഭ്യന്തര വകുപ്പിന്റെ കീഴിലുള്ള സ്പെഷ്യല്‍ ബ്രാഞ്ച് സി ഐ ഡി വിഭാഗം ഹൈ ടെക് ക്രയിം എന്ക്വയറി സെല്ലിനെ ചുമതലപ്പെടുത്തിയിരിക്കുകയാണ്. സംസ്ഥാന മന്ത്രിസഭയുടെ റിമോട്ട് തന്നെ മുസ്ലിം ലീഗിന്റെ കയ്യിലാണെന്നു ചില സാമുദായിക സംഘടനകള്‍ മുക്രയിട്ടു നടക്കുമ്പോളാണ് മുസ്ലിം ലീഗ് നേതാക്കളുടെ വരെ ഈ മെയില്‍ ചോര്‍ത്താന്‍ പോലീസ് പദ്ധതിയിട്ടിരിക്കുന്നത്. ലീഗ് നേതാക്കള്‍ക്ക് ഇതാണ് ഗതിയെങ്കില്‍ സമുദായത്തിന്റെ ഏറുപടക്കങ്ങളായ പോപ്പുലര്‍ ഫ്രാണ്ടിന്റെയും, ജമാഅത്തെ ഇസ്ലാമിയുടെയും ഒക്കെ കാര്യം പറയേണ്ടല്ലോ.. അവരുടെ നേതാക്കന്മാരുടെ ഈ മെയില്‍ ചോര്‍ത്തുംപോള്‍ മറ്റു മുസ്ലിം വിഭാഗങ്ങള്‍ക്ക് പരിഭവം പാടില്ലായെന്ന് കരുതിയാവും കടക്കല്‍ അബ്ദുല്‍ അസീസ്‌ മൌലവിയുടെ പാര്‍ട്ടിയുടെ നേതാക്കന്മാരെയും, കേരള നദവത്തുല്‍ മുജാഹിദീനിന്റെ നേതാക്കന്മാരെയും ഒക്കെ ഈ ലിസ്റ്റില്‍ ഉള്‍പ്പെടുത്തിയിട്ടുണ്ട്. മുസ്ലിം പത്ര പ്രവര്‍ത്തകരും, പ്രോഫഷനലുകളുമുണ്ട്. തങ്ങളുടെ സ്വകാര്യ ഈ മെയിലുകള്‍ സര്‍ക്കാര്‍ ഇടപെട്ടു ചോര്‍ത്തുന്നു എന്നറിഞ്ഞതോടെ,  പ്രവാസികളായ പലരും തങ്ങളുടെ ഭാര്യമാര്‍ക്കുള്ള ഈ മെയിലുകള്‍ അങ്ങ് തിരുവനന്തപുരത്തുള്ള പോലീസ് ആസ്ഥാനത്തേക്ക് അയച്ചു കൊടുത്താലോ എന്നാലോചിച്ചു കൊണ്ടിരിക്കുകയാണ്. പോലീസിനും വേണ്ടേ എന്തെങ്കിലും പണി.
 ലൌ ജിഹാദിന്റെ പേരില്‍ കേരളത്തിന്റെ തെരുവുകളില്‍ മതപ്രബോധനത്തിനും, ആവിഷ്കാര സ്വാതന്ത്ര്യത്തിനും ഏറെ കാലം തടസ്സം സൃഷ്ട്ടിച്ചവര്‍ ഇപ്പോള്‍ പുതിയ മാര്‍ഗം തേടുകയാണ് എന്ന് വേണമെങ്കില്‍ പറയാം, വീ എസ് അച്ചുതാനന്ദന്‍ പ്രത്യേക താല്പര്യമെടുത്തും,  മനോരമ പത്രം എഴുത്തിലൂടെയും, കൃസ്തീയ സഭകള്‍ ഇടയലേഖനങ്ങളിലൂടെയും, സംഘപരിവാരങ്ങള്‍ അവരുടെ വെബ് സൈറ്റിലൂടെയും ഊതി വീര്‍പ്പിച്ച ലൌ ജിഹാദ് എന്ന മുസ്ലിം വിരുദ്ധ ബലൂണ്‍ പൊട്ടി ചിതറി നാമാവശേഷമായതു പോലെ ഈ ഈ മെയില്‍ ഹാക്കിങ്ങും, കുത്സിത നീക്കങ്ങളും തകരുക തന്നെ ചെയ്യും. 

മാലിക്കാരി മറിയം റഷീദയെ മുസ്ലിമായി എന്ന ഒറ്റക്കാരണത്താല്‍ ചാരവൃത്തി ആരോപിച്ചു പീഡിപ്പിച്ചവരാണ് നമ്മുടെ മാധ്യമങ്ങളും, നിയമപാലകരും. രാഷ്ട്രപതിക്ക് ഈ മെയിലില്‍ വധഭീഷണി അയച്ചു എന്ന കാരണം പറഞ്ഞു അറസ്റ്റു ചെയ്തു കൊണ്ട് പോയി നിരപരാധിയായ ഒരു മുസ്ലിം ചെറുപ്പക്കാരനെ പീഡിപ്പിച്ചവര്‍  തന്നെ യഥാര്‍ത്ഥ പ്രതിയായ ഒരു അമുസ്ലിം യുവാവിനെ പിടി കൂടിയപ്പോള്‍ അയാളെ മാനസിക രോഗിയായി മുദ്ര കുത്തി കേസില്‍ നിന്നും രക്ഷപ്പെടുത്തിയ നാടാണിത്. കോഴിക്കോട്  ആര്‍ സി സി യില്‍ നിന്നും സെമസ്റര്‍ പൂര്‍ത്തിയാക്കി ബംഗ്ലൂരില്‍ സോഫ്റ്റ്‌ വെയര്‍ എന്ജിനീയരായ ഒരു മുസ്ലിം യുവാവിനെ പീഡിപ്പിച്ചത് ഇതിനേക്കാള്‍ ക്രൂരമായാണ്,  ആ യുവാവ് ജോലി ചെയ്തിരുന്ന മള്‍ട്ടി നാഷണല്‍ കമ്പനിയില്‍ നിന്നും മാറി മറ്റൊരു കമ്പനിയിലേക്ക്  ചേക്കേറിയതിന്റെ  പക തീര്‍ക്കാന്‍ അവിടെയും പ്രയോഗിച്ചത്  തീവ്രവാദം  ആരോപിച്ചു ജയിലിലടക്കുക എന്നതായിരുന്നു.

മുസ്ലിമായാല്‍ ഇങ്ങനെയൊക്കെ പ്രയാസങ്ങളും, പ്രതിസന്ധികളും ഒക്കെ നേരിടേണ്ടി വരുമെന്ന് ഇതര സമൂഹത്തെ ഭയപ്പെടുത്തുകയാണ്  ഇത്തരം ചെയ്തികളിലൂടെ സര്‍ക്കാരും, നിയമപാലകരും ലക്ഷ്യമാക്കുന്നതെങ്കില്‍ അവര്‍ ജീവിക്കുന്നത് വിഡ്ഢികളുടെ സ്വര്‍ഗത്തിലാണ്. ആഗോള തലത്തില്‍  തന്നെ പ്രതിസന്ധികളിലൂടെയാണ് മുസ്ലിം സമൂഹം കടന്നു പോകുന്നത് എന്ന് വാര്‍ത്ത മാധ്യമങ്ങളും, സോഷ്യല്‍ നെറ്റ് വര്‍ക്കുകളും പരിശോധിച്ചാല്‍ മനസ്സിലാകും, ഇസ്ലാമിക പൈതൃകം ഉള്കൊണ്ടിരുന്ന രാജ്യങ്ങളില്‍ അസ്ഥിരത സൃഷ്ട്ടിച്ചും, അട്ടിമറികള്‍ നടത്തിയും ഇസ്ലാമിനെ ഉന്മൂലനം ചെയ്യാമെന്ന് വൃഥാ വേല ചെയ്യുന്നവര്‍ അവസാനം വൃഥാവിലാകും തീര്‍ച്ച.    
പ്രതിസന്ധികള്‍ നേരിട്ടപ്പോഴൊക്കെ ലോകത്ത് ഇസ്ലാമിന് മുന്നേറ്റമേ  ഉണ്ടായിട്ടുള്ളൂ എന്നതാണ് ചരിത്രം. സപ്തംബര്‍ പതിനൊന്നിന്റെ അമേരിക്കന്‍ ആക്രമണത്തിനു ശേഷം ലോക രാജ്യങ്ങള്‍ ഒന്നടങ്കം ഇസ്ലാമിന് നേരെ ഭീകരതയുടെ കുറ്റം ആരോപിക്കുകയായിരുന്നു. എന്നിട്ടും ലോകത്ത് ഇസ്ലാമിലേക്ക് കടന്നു വരുന്നവരുടെ എണ്ണം ദിനം പ്രതി വര്‍ധിച്ചു കൊണ്ടിരുന്നു. അമേരിക്കയില്‍ ഇസ്ലാമാണ് ദ്രുതഗതിയില്‍ വളര്‍ച്ച നേടുന്നതെന്ന് സി എന്‍ എന്‍ അടിവരയിടുന്നു. ഇരുപതു വര്ഷം മുമ്പ് ലോകത്താകമാനം 1 . 1 ബില്ല്യന്‍  ആയിരുന്നു മുസ്ലിം ജനസംഖ്യയെങ്കില്‍ ഇന്നത്‌ 2 .1 ബില്ല്യനാണ്.  മുന്‍  ബ്രുട്ടീഷ്  പ്രധാന മന്ത്രി ടോണി ബ്ലെയരുടെ അനന്തരവളായ ലൌരെന്‍ ബൂത്തു പോലും ഇപ്പോള്‍ മുസ്ലിമാണ്. കൃസ്തീയ, ജൂത പുരോഹിതന്മാരും, ലോക പ്രശസ്തരായ സ്പോര്‍ട്സ്/ സംഗീത താരങ്ങളും ഒക്കെ  ഇസ്ലാമിലേക്ക് കടന്നു വരുന്ന കാഴ്ചയാണിന്നു.   കോണ്‍സ്റ്റന്റൈനിന്റെ  കൊട്ടാരത്തിലേക്ക് കടന്നു ചെന്ന ഈ സന്ദേശം ഇപ്പോള്‍ കൊട്ടാര ഭിത്തികള്‍ക്കുള്ളിലെക്കും വെളിച്ചം വീശുന്നുവെങ്കില്‍ അത്  തോക്കിന്റെയോ, പ്രതികാരത്തിന്റെയോ മുഷ്ക്കു കാട്ടിയായിരുന്നില്ല. അതിരുകളില്ലാത്ത ക്ഷമയുടെ പരിണിതിയാണ് അതെന്നു മനസ്സിലാക്കേണ്ടത് മുസ്ലിംകളാണ്.  2030 ആകുമ്പോഴേക്കും ലോക ജനസംഖ്യയിലെ മൂന്നില്‍ ഒന്ന് മുസ്ലിംകളായി മാറുമെന്ന രീതിയില്‍ അതിശീഘ്രമാണ്  ഇസ്ലാമിന്റെ വളര്‍ച്ചയെന്നു സമ്മതിക്കുന്നത് പാശ്ചാത്യ മീഡിയ എന്ന് അറിയപ്പെടുന്ന സി എന്‍ എന്‍ തന്നെ.

ഇസ്ലാമിന്റെ വളര്‍ച്ചയില്‍ ഭീതി പൂണ്ട ആഗോള ജൂത-കൃസ്തീയ ലോബി പുതിയ തന്ത്രങ്ങള്‍ മെനഞ്ഞു കൊണ്ടിരിക്കുകയുമാണ്. ഇസ്ലാമോഫോബിയ എന്ന വിഷവിത്ത്‌ വിതച്ചു കൊയ്യാമെന്നാണ് അവര്‍ മോഹിക്കുന്നത്. പ്രകൊപനങ്ങളില്‍ വീഴ്ത്തി മുസ്ലിംകളില്‍ നിന്നും ഭീകരവാദികളെ സൃഷ്ടിക്കാന്‍ വേണ്ടിയുള്ള ശ്രമങ്ങളാണ് മുറക്ക് നടന്നു കൊണ്ടിരിക്കുന്നത്. അഫ്ഗാനിസ്ഥാനില്‍ അമേരിക്കന്‍ പട്ടാളക്കാര്‍ മയ്യിത്തുകള്‍ക്കു മേല്‍ മൂത്രവിസര്‍ജ്ജനം നടത്തുന്ന രംഗം മാധ്യമങ്ങളില്‍ എത്തിയത് പോലും ഇത്തരത്തില്‍ പ്രകോപനങ്ങള്‍ക്ക്‌ വേണ്ടി മാത്രമായിരുന്നു. ഖുര്‍ആന്‍ കത്തിക്കാന്‍ വേണ്ടി ആഹ്വാനം ചെയ്തവര്‍ ലക്‌ഷ്യം നേടാതെ പോയത് പോലെ ഗൂഡ തന്ത്രങ്ങളൊന്നും ഇപ്പോള്‍ ഫലിക്കുന്നില്ലയെന്നത് അവരെ കൂടുതല്‍ അസ്വസ്ഥരാക്കുന്നു. ആഗോള തലത്തില്‍ പാളിപ്പോയ ഈ തന്ത്രമാണ് ഇന്ന് കേരളക്കരയിലും പയറ്റുന്നത്, അത് പല രൂപത്തിലാണ് എന്ന് മാത്രം.

ഒരു വര്ഷം മുമ്പ് പത്തനംതിട്ടയിലും, ചുങ്കപ്പാരയിലും,  തൊടുപുഴയിലും ഒക്കെ പ്രവാചകനെ (സ അ) നിന്ദിച്ചു കൊണ്ട് ലഘു ലേഖകളും, ചോദ്യ പേപ്പറുകളും ഇറങ്ങിയത്‌ ഇതിനോട് ചേര്‍ത്തു വായിക്കേണ്ടതാണ്, മുസ്ലിംകളില്‍ നിന്നും പ്രകോപനം ഉണ്ടാക്കുക ലക്ഷ്യമാക്കിയുള്ള തന്ത്രമായിരുന്നു അതെന്നു തിരിച്ചറിയാതെ, ചോദ്യം തയ്യാറാക്കിയെന്നു പറയപ്പെടുന്ന പ്രൊഫസറുടെ കൈ വെട്ടിയ നടപടി തീര്‍ത്തും ഹീനമായിരുന്നില്ലേ. പ്രവാചക നിന്ധക്കെതിരെ കേരളീയ സമൂഹത്തിന്റെ പൊതു ശ്രദ്ധ തിരിച്ചു കൊണ്ട് വരുന്നതിനിടെ നടന്ന ഈ അതിക്രമം  കൊണ്ട് ഇസ്ലാമിക പ്രബോധനത്തിന് നേരിട്ട പ്രയാസങ്ങളെ കണ്ടില്ലെന്നു നടിക്കാനാവുമോ?  പ്രതിസന്ധികളില്‍ ഇസ്ലാം കൂടുതല്‍ പ്രകാശിക്കുന്നു എന്ന സത്യം മുസ്ലിംകളല്ലേ ആദ്യം തിരിച്ചറിയേണ്ടത്.
മുസ്ലിം ലീഗിന്റെയും, മറ്റു മുസ്ലിം സംഘടനകളിലെയും നേതാക്കന്മാരുടെ ഈ മെയില്‍ ചോര്‍ത്താനുള്ള നീക്കം എന്ത് സംശയത്തിന്റെ ബലത്തിലാണെങ്കിലും അതിനു ന്യായീകരണങ്ങളില്ല. പക്ഷെ  അത് തെരുവിലേക്ക് വലിച്ചു നീട്ടി കൂടുതല്‍ പ്രകോപനങ്ങള്‍ സൃഷ്ടിക്കുന്നതിലും നല്ലത് സംയമനം തന്നെയാണ്.  താടി വെച്ചതിന്റെ പേരിലും, ഞെരിയാനിക്ക് മുകളില്‍ വസ്ത്രം ധരിച്ചതിന്റെ പേരിലും ഒക്കെ വിമാനതാവളങ്ങളിലും മറ്റും മണിക്കൂറുകളോളം മാറ്റി നിറുത്തപ്പെട്ട ഇസ്ലാമിക പണ്ഡിതന്മാര്‍ ഈ കേരളക്കരയില്‍ തന്നെയുണ്ട്‌.  മുസ്ലിം നാമധാരികള്‍ ആയതിനാല്‍ പ്രത്യേക ദേഹ പരിശോധനക്ക് വിധേയനാക്കപ്പെട്ട സിനിമാ താരങ്ങളും, മുന്‍ ഇന്ത്യന്‍ രാഷ്ട്രപതിയും വരെയുണ്ട്. കേള്‍ക്കുമ്പോഴേക്കു കൊടിയെടുത്തു റോഡില്‍ ഇറങ്ങും  മുമ്പ് ഒന്ന് ചിന്തിച്ചാല്‍ ഇസ്ലാമിന് അതുപകരിക്കും, തീര്‍ച്ച. ക്ഷമയെക്കള്‍ നല്ല മരുന്ന് വേറെയില്ലല്ലോ..

(വിശുദ്ധ ഖുര്‍ആന്‍ 16  :  125 )

ശിഷ്ടം : അത്യധികം മലീമസമായ സാമൂഹ്യ ചുറ്റുപാടില്‍  മുസ്ലിമാവാന്‍ തന്നെ പിടിപ്പതു പണി..മുസ്ലിമായാലും പണി... ഹല്ലാ പിന്നെ.

2011 ഡിസംബർ 30

നിങ്ങള് കുപ്പ്യാണെങ്കില്‍ ഞമ്മള് കുപ്പിച്ചില്ലാണേ....

നിങ്ങള് കുപ്പ്യാണെങ്കില്‍ ഞമ്മള് കുപ്പിച്ചില്ലാണേ...എന്ന് പറഞ്ഞ മാതിരിയാണ് ഞമ്മളെ മാധ്യമം പത്രത്തിന്റെ അവസ്ഥ. നല്ലത് ബെടക്കായാല്‍ ഇങ്ങനെയൊക്കെയാവുമെന്നു തെളിയിക്കാനുള്ള പട പുറപ്പാടിലാണിവര്‍. ഇസ്ലാമിന്റെ സമഗ്രതക്ക് വേണ്ടി വാവിട്ടു കരയുന്ന ജമാഅത്തെ ഇസ്ലാമിയുടെ വഴിത്തിരിവ് പത്രം 20 രൂപാ ടിക്കറ്റ് വെച്ച് തിരൂര്‍ രാജീവ് ഗാന്ധി സ്റ്റേഡിയത്തില്‍ നടത്തി വരുന്ന ഡിസംബര്‍ ഫെസ്റ്റ് കണ്ടപ്പോള്‍ അങ്ങനെ തോന്നിപ്പോയി...തിരൂരിന് ഇനി ഉത്സവച്ചൂടിന്റെ മഞ്ഞു കാലം എന്നാണു ഈ വ്യാപാര നൃത്ത മേളക്ക് മാധ്യമം പരസ്യവാചകം കൊടുത്തിരിക്കുന്നത്.. ഡിസംബറിന്റെ സായാഹ്നങ്ങളില്‍, പുതുവര്‍ഷത്തിന്റെ ലഹരി പടരുമ്പോള്‍ ഹരം കൊള്ളിക്കാന്‍ ഒരിസ്ലാമിക പത്രത്തിന്റെ  വക സര്‍ക്കസും, ഗാനമേളയും, സിനിമാറ്റിക് ഡാന്‍സുമൊക്കെയായാല്‍ സംഗതി ബഹുകേമം തന്നെ.. അതും മുസ്ലിം ഭൂരിപക്ഷ പ്രദേശമായ തിരൂരില്‍...മൂല്യാധിഷ്ടിത പത്രപ്രവര്‍ത്തനത്തിന്റെ ഇസ്ലാമിക മോഡലായി മാധ്യമത്തെ ഉയര്‍ത്തി കാട്ടുന്ന ജമാഅത്തെ ഇസ്ലാമിയുടെ അണികള്‍ പോലും തിരൂരിലെത്തുംപോള്‍ തല താഴ്ത്തി നടക്കേണ്ട ഗതികേടിലാണിപ്പോള്‍.

തിരൂരിന് ഇനി ഉത്സവചൂടിന്റെ മഞ്ഞു കാലം എന്നാണു ഈ പരിപാടിക്ക് നല്‍കിയ തലക്കെട്ട്‌..അതേതായാലും നന്നായി, നാളിതു വരെ ജമാഅത്തെ ഇസ്ലാമി തെരഞ്ഞെടുപ്പു ചൂടിനിടയില്‍ മാധ്യമം കൊണ്ട്  കാണിക്കാറുള്ള സര്‍ക്കസ് മാത്രമേ  പരിചയമുള്ളൂ, ആ സര്‍ക്കസൊക്കെ   തെരഞ്ഞെടുപ്പു കഴിയുമ്പോഴേക്കും മഞ്ഞോ,ആവിയോ ഒക്കെയായിപ്പോകാറാണ് പതിവും. രണ്ടു കയ്യിലും കൂടി എണ്ണിത്തീര്‍ക്കാവുന്ന വോട്ടേ ഞമ്മക്കുള്ളൂവെന്ന് മാലോകര്‍ അറിഞ്ഞതോടെ ഇപ്പോള്‍ അറബ് വസന്തം ആഘോഷമാക്കുകയാണ്. ആ ആഘോഷത്തിന്റെ ഭാഗമാണോ ഈ സര്‍ക്കസ് മാമാങ്കമെന്നു ചോദിക്കുന്നവരുമുണ്ട്. 

ജമാഅത്തെ ഇസ്ലാമിക്ക് വേണ്ടി  നിലം പാകപ്പെടുത്തുന്ന പണിയാണല്ലോ മാധ്യമത്തിനും, സോളിടാരുട്ടികള്‍ക്കും...ഇസ്ലാമിനെ കെട്ടിപ്പൂട്ടി അട്ടത്തു വെച്ചു കൊണ്ടുള്ള ഈ മാമാങ്കങ്ങളും അതിനു വേണ്ടി മാത്രം...മീഡിയ വണ്‍ എന്ന ഞമ്മന്റെ ചാനല്‍ വരുന്നതോടെ അത് കൂടുതല്‍ ബോധ്യമാകും, വെയിറ്റ് ആന്‍ഡ്‌ സീ... തുനീഷ്യയിലും, ഈജിപ്തിലും, ഒക്കെ നടന്ന മുല്ലപ്പൂവിപ്ലവങ്ങളെ കുറിച്ചു പ്രസ്ഥാന നേതാക്കള്‍ പ്രസംഗിക്കുന്നതും, എഴുതുന്നതും ഒക്കെ ഈ രാഷ്ട്രീയ ലക്‌ഷ്യം വെച്ച് കൊണ്ടാണ്. പലപ്പോഴും ഇതൊക്കെ  കേള്‍ക്കുമ്പോഴും, വായിക്കുമ്പോഴും 2011 ലെ ഏറ്റവും വലിയ തമാശയെന്നോര്‍ത്തു ആരും ഊറിച്ചിരിച്ചു പോകും, അറബ്  വിപ്ലവത്തിന്റെ സമരമുഖങ്ങളില്‍ എത്തി നോക്കാതെ മാറി നിന്നവരാണ് പിന്നീട് അധികാരത്തില്‍ കയറാന്‍ കവാത്ത് മറച്ചു കൊണ്ട് രംഗ പ്രവേശം ചെയ്തത്. മുസ്ലിം ബ്രദര്‍ ഹൂഡ് അതിന്റെ പ്രഖ്യാപിത ലക്ഷ്യങ്ങളില്‍  നിന്നും മാറി പേര് മാറ്റി ഫ്രീഡം ഫോര്‍ സോഷ്യല്‍ ജസ്റ്റീസ് എന്ന പേരില്‍ ഈജിപ്തില്‍ രംഗത്തിറങ്ങിയത് പോലെ ജമാഅത്തെ ഇസ്ലാമിയുടെ ഇന്ത്യന്‍ നാടകമാണ് പുതിയ വെല്‍ഫയര്‍ പാര്‍ട്ടിയും..ഒരു മഴയ്ക്ക് പൊന്തുന്ന ഇയ്യം പാറ്റകളെ പോലെ ഒരു തെരഞ്ഞെടുപ്പിനുള്ള ആയുസ്സെങ്കിലും ഈ പാര്‍ട്ടിയുടെ പേരിനുണ്ടാവട്ടെ....


തിരൂര്‍ വഴി പോകുന്നവര്‍ താഴെപാലത്തെത്തിയാല്‍ തിരൂര്‍ പുഴയോട് ചാരി കൂറ്റന്‍ പന്തല് കെട്ടി മാധ്യമത്തിന്റെ മാമാങ്കം കാണാം.    അകത്തു തട്ടലും മുട്ടലും കേട്ടാല്‍ അത് ശൂറാ മീറ്റിംഗ് ആണെന്ന് തെറ്റിദ്ധരിക്കേണ്ട.. 20 രൂപ ടിക്കറ്റ് എടുത്തു അകത്തു കയറിയാല്‍ ഏതെങ്കിലും ഒരു മൂലയിലെങ്കിലും അമീരിന്റെയോ, അസിസ്റ്റന്റ്‌ അമീരിന്റെയോ ഒക്കെ  പ്രഭാഷണം കേള്‍ക്കാമെന്ന് കരുതിയാലും തെറ്റി..ഡിസംബറിന്റെ ഈ തണുത്ത സായാഹ്നങ്ങളില്‍ സിരകളെ ത്രസിപ്പിക്കാന്‍   ജമാഅത്ത്കാര്‍ക്കും വേണ്ടേ എന്തെങ്കിലും  ഫെസ്റ്റോ, ഉത്സവമോ ഒക്കെ..   നാളിതു വരെ ജമാഅത്തെ ഇസ്ലാമി എക്സിബിഷന്‍ നടത്താറുള്ളത് അവരുടെ സമ്മേളന സ്ഥലങ്ങളിലാണ്, ഐ പി എച്ചിന്റെ (കഞ്ഞിവെള്ളത്തില്‍ തൂമിച്ച) പുസ്തകങ്ങള്‍ക്ക് പുറമേ ഇസ്ലാമിന്റെ സന്ദേശം പകരുന്ന എന്തെങ്കിലും അല്ലറ ചില്ലറ ഉടായിപ്പുകളൊക്കെ അത്തരം എക്സിബിഷനുകളില്‍ കാണാറുമുണ്ട്. എന്നാല്‍ തിരൂരിലെത്തുന്ന ജനങ്ങള്‍ക്ക്‌ തികച്ചും വ്യത്യസ്തമായ ഈ ജമാഅത്തെ ഇസ്ലാമി മാമാങ്കം കണ്ടു കോരിത്തരിക്കാനാണ് വിധി.

ഗ്രാന്റ് കേരള ഷോപ്പിംഗ്‌ ഫെസ്റ്റിവലിന്റെ പേരിലാണ് മാധ്യമം തിരൂരില്‍ വ്യാപാര-നൃത്ത മേള സംഘടിപ്പിച്ചിരിക്കുന്നത്..ഇസ്ലാമിക സംസ്കാരത്തെ തന്നെ ചോദ്യം ചെയ്യുന്ന സംഗീത-നൃത്ത സന്ധ്യകളിലൂടെ മനോരമയെ പോലും നാണിപ്പിച്ചു കൊണ്ടാണ് മാധ്യമത്തിന്റെ ഈ കൂത്താട്ടം..മുഹമ്മദ്‌ റാഫി, കിഷോര്‍കുമാര്‍ നൈറ്റും, പട്ടുര്‍മാല്‍ നൈറ്റും, ആദിവാസി നൃത്തങ്ങളും, സിനിമാറ്റിക് നൃത്തങ്ങളും മാധ്യമത്തിന്റെ വേദിയില്‍ അരങ്ങു തകര്‍ക്കുമ്പോള്‍  ജനുവരി ഒന്ന് വരെ നീണ്ടു നില്‍ക്കുന്ന മേളയുടെ സംഘാടകരായി നിറഞ്ഞു നില്‍ക്കുന്ന സോളിടാരിട്ടി പ്രവര്‍ത്തകര്‍ക്ക് രാത്രിയായാല്‍ മദ്യക്കുപ്പികള്‍ വരെ പെറുക്കി എടുക്കേണ്ട ഗതികേട്.

ഇത്തരം പരിപാടികളെ കുറിച്ചു ചോദ്യം ചെയ്തവരോട്‌ അത് മാധ്യമത്തിന്റെതല്ലേ ഞങ്ങളെന്തു പിഴച്ചു എന്ന അലസമായ മറുപടി പറയുന്നുണ്ട് ജമാഅത്തെ ഇസ്ലാമിക്കാര്‍. കേരള സര്‍ക്കാരിന്റെ ഷോപ്പിംഗ്‌ ഫെസ്റ്റിവലിന്റെ ഭാഗമാണ് എന്നും തട്ടി വിടുന്നുണ്ട്..ഈ ഗ്രാന്റ് കേരള ഫെസ്റ്റിവലില്‍ പങ്കെടുക്കുന്ന എല്ലാ പത്രങ്ങളും, ചാനലുകളും, സ്ഥാപനങ്ങളും ഒക്കെ  ഇമ്മാതിരി ഗമണ്ടന്‍ തട്ടിപ്പുകളുമായി സ്റ്റെജോരുക്കി പാട്ടും കൂത്തും നടത്തുന്നുണ്ട് എന്നും പറഞ്ഞൊപ്പിക്കുന്നുണ്ട്. മറ്റുള്ള പത്രങ്ങളെ പോലെ അധപ്പതിക്കാനായിരുന്നെങ്കില്‍ ഞമ്മള്‍ എന്തിനു മാധ്യമം വാങ്ങണം,  മനോരമയോ, മാതൃഭുമിയോ വാങ്ങിയാല്‍ പോരെയെന്ന മറുചോദ്യം വന്നാല്‍ ജമാഅത്തെ ഇസ്ലാമിക്കാരന്റെ  പൊടി പോലുമില്ല പിന്നെ കണ്ടു പിടിക്കാന്‍...

ജമാഅത്തെ ഇസ്ലാമിയുടെ പള്ളികളില്‍ നമസ്കാരത്തിനെത്തുന്നവരോട് ഹല്ഖകളിലെ പ്രധാന പ്രവര്‍ത്തകര്‍ പണ്ടൊക്കെ ചോദിക്കാറുണ്ട് 'വൈകീട്ടെന്താ പരിപാടി..'എന്ന്..  വൈകുന്നേരം നടക്കുന്ന ഏതെങ്കിലും പോതുയോഗങ്ങളിലെക്കോ, ക്ലാസ്സുകളിലെക്കോ ക്ഷണിക്കാന്‍ വേണ്ടിയായിരുന്നു ആ ചോദ്യമെങ്കില്‍ ഇപ്പോള്‍ വൈകീട്ടെന്താ പരിപാടിയെന്ന് സോളിടാരിട്ടിക്കാര്‍ ചോദിക്കുമ്പോള്‍ അത് നമ്മുടെ സൂപ്പര്‍ സ്റ്റാര്‍ ലാലേട്ടന്‍  ചോദിച്ചത് പോലെ ആസ്വാദകര്‍ക്ക് തോന്നുന്നുവെങ്കില്‍ അവരെ കുറ്റം പറഞ്ഞിട്ട് കാര്യമുണ്ടോ?. .ജീവിതത്തിന്റെ സമഗ്ര മേഖലയിലും ഇസ്ലാമിനെ സ്ഥാപിക്കാന്‍ വേണ്ടി സ്റ്റേജും, പേജും ചെലവഴിച്ചവരുടെ സ്റ്റേജില്‍ നിന്നും പ്രവാചകന്‍ വിലക്കിയ സംഗീത/നൃത്ത മാമാങ്കങ്ങള്‍ കാണുമ്പോള്‍ സംശയിക്കേണ്ട..ഇതൊരു തുടക്കം മാത്രം..ഞമ്മക്കും കിട്ടണം പണം..ഞമ്മന്റെ ചാനല്‍ ഭൂമി മലയാളത്തില്‍ കാലു കുത്തും  മുമ്പ് അതിന്റെയൊരു സാമ്പിള്‍ വെടിക്കെട്ട്‌ മാത്രമാണീ തിരൂരിലെ മാമാങ്കം.
നൃത്ത-നൃത്യങ്ങളും, സംഗീത നിശകളും മാത്രമല്ല, മാധ്യമത്തിന്റെ പേരില്‍ നടക്കുന്ന ഈ വാണിജ്യ വ്യാപാര മേളയില്‍ പലിശ സ്ഥാപനങ്ങളുടെയും, ചിട്ടി തട്ടിപ്പുകാരുടെയും ഒക്കെ കൌണ്ടറുകള്‍ കാണാമെന്നതാണ് അതിലേറെ കൌതുകം. ഇരുപതു രൂപ കൊടുത്തു ടിക്കറ്റ്എടുത്തു അകത്തു കയറിയാല്‍ പിന്നെ അമ്യുസ്മെന്റ് പാര്‍ക്കുകളുമുണ്ട്...അതിനു ടിക്കറ്റ് വേറെ. ഏതായാലും മാധ്യമത്തിന്റെ പേരിലുള്ള ഈ ജമാഅത് സര്‍ക്കസിന് ടിക്കറ്റ് എടുത്തവരില്‍ നിന്നും ഓരോ അര മണിക്കൂറും ഇടവിട്ട്‌ നറുക്കെടുക്കുകയും, ആകര്‍ഷകമായ സമ്മാനങ്ങള്‍ നല്‍കുകയും ചെയ്യുന്നു. ദിവസേനയുള്ള നറുക്കെടുപ്പില്‍ വിജയിക്കുന്ന അമ്പതു പേര്‍ക്ക് വാട്ടര്‍ തീം പാര്‍ക്കിലേക്ക് പ്രവേശന ടിക്കറ്റ് നല്‍കുന്നതിനു പുറമേ മെഗാ ബംബര്‍ സമ്മാനമായി ലാപ്ടോപ്പും, മോട്ടോര്‍ ബൈക്കും ഒക്കെ വാഗ്ദാനം ചെയ്യുന്നു ഈ ഇസ്ലാമിക പത്രം..ബലേ ഭേഷ്... മനോരമയുടെയും, മാതൃഭൂമിയുടെയും, ദേശാഭിമാനിയുടെയും, കേരള കൌമുദിയുടെയും നറുക്കെടുപ്പുല്സവങ്ങളെ, സമ്മാന  പദ്ധതികളെ  കണക്കിന് പരിഹസിച്ഛവരും, അവരുടെ പത്രവും എത്തിച്ചേര്‍ന്ന ദുര്‍ഗതിയോര്‍ത്തു സഹതപിക്കുകയല്ലാതെ വേറെന്തു ചെയ്യാന്‍. 

മുതലാളിത്ത സംസ്കാരം വളര്‍ത്തുന്ന ഇത്തരം മേളകള്‍ക്കെതിരെ ഒലക്ക മുക്കി ലേഖനം എഴുതിയ ജമാഅത്തെ ഇസ്ലാമി നേതാക്കള്‍ക്ക്  ഇപ്പോള്‍ മിണ്ടാന്‍ വയ്യാത്ത സ്ഥിതിയാണുള്ളത്, ധൂര്‍ത്തിനും, അധാര്‍മ്മികതകള്‍ക്കുമെതിരെ പേനയുന്തിയവരും, കുത്തകകള്‍ക്കെതിരെ മുഷ്ട്ടി ചുരുട്ടിയവരും ഇപ്പോള്‍ മൌനത്തിലാണ്. രാത്രി പതിനൊന്നു മണി വരെ നീണ്ടു നില്‍ക്കുന്ന ഈ മാധ്യമം സര്‍ക്കസ് കഴിയുന്നത്‌ വരെ തിരൂര്‍ പരപ്പനങ്ങാടി റോഡില്‍ ഇടയ്ക്കിടയ്ക്ക് ഗതാഗത സ്തംഭനം തന്നെ. വഴിയില്‍ നിന്ന് മുള്ള് നീക്കം ചെയ്യുന്നത് വിശ്വാസത്തിന്റെ ഭാഗമാണെന്നു ഇവരോട് പറഞ്ഞിട്ടുണ്ടോ കാര്യം..അകത്തു നടക്കുന്നതു അതിനേക്കാള്‍ വലിയ ഇസ്ലാമിക വിരുദ്ധ പ്രവര്‍ത്തനമാവുംപോള്‍ കാട്ടുകോഴിക്കെന്തു ചംക്രാന്തി..ഹല്ലാ പിന്നെ. 

പള്ളിയില്‍ സുബഹി നമസ്കാരം കഴിഞ്ഞാല്‍ ഹല്‍ഖാ നേതൃത്വത്തിന്റെ കീഴില്‍ വരിക്കാരെ ചേര്‍ക്കാനും, പരസ്യം പിടിക്കാനും ഒക്കെ നാട്ടപ്പാച്ചിലാണ്, നേരിന്റെ പക്ഷത്തു നില്‍ക്കുന്ന ഏക ഇസ്ലാമിക പത്രം എന്ന് നാഴികക്ക് നാല്‍പ്പതു വട്ടം കേട്ടിഘോഷിക്കാറുമുണ്ട്. ബി ആര്‍ പി ഭാസ്കറും, സി ആര്‍ നീലകണ്ടനും ഒക്കെ മാധ്യമത്തെ കുറിച്ച് പറഞ്ഞ സ്തുതികീര്‍ത്തനങ്ങള്‍ പൊടിപ്പും തൊങ്ങലും വെച്ച് അവതരിപ്പിക്കാറുമുണ്ട്. മലയാളത്തിന്റെ മുഖ്യധാരാ പത്രങ്ങള്‍ തമസ്കരിക്കുന്ന വാര്‍ത്തകള്‍ ധൈര്യ സമേതം പ്രസിദ്ധീകരിക്കുന്ന പത്രം, കഴിഞ്ഞ ഇന്ത്യന്‍ റീഡര്ഷിപ്പ് സര്‍വേ പ്രകാരം കേരളത്തില്‍ ഏറ്റവും കൂടുതല്‍ വളര്‍ച്ച നിരക്ക് രേഖപ്പെടുത്തിയ പത്രം അങ്ങനെ പോകുന്നു മാധ്യമത്തിന്റെ മദ്ഹുകള്‍..
'മാധ്യമം' പോലൊരു പത്രം കേരളത്തില്‍  ചരിത്രപരമായ അനിവാര്യതയായിരുന്നു. ആഗോളതലത്തില്‍  തന്നെ ചര്‍ച്ചയുടെ  മര്‍മസ്ഥാനത്തേക്ക് കയറാന്‍  തുടങ്ങിയ ഇസ്ലാമികരാഷ്ട്രീയത്തെ നേരിട്ട് അവതരിപ്പിക്കാനെത്തിയ 'മാധ്യമ'ത്തിന് അതേസമയത്ത് ആവേശത്തോടെ ചര്‍ച്ച ചെയ്യപ്പെട്ട ഇതര ചിന്താ പദ്ധതികളെയും കണ്ടില്ലെന്ന് നടിക്കാന്‍  കഴിയുമായിരുന്നില്ല. വര്‍ഗരാഷ്ട്രീയം മാത്രമാണ് പുരോഗമനപരം എന്ന സൈദ്ധാന്തികബാധ്യതയില്‍ ഇടതുപക്ഷം അവഗണിച്ച പ്രാന്തവല്‍കൃതരുടെയും ദുര്‍ബലവിഭാഗങ്ങളുടെയും പ്രശ്നങ്ങള്‍  അവതരിപ്പിക്കാനുള്ള വിശാലമായ പ്ലാറ്റ്ഫോം 'മാധ്യമ'മാണ് മുഖ്യധാരയില്‍ സൃഷ്ടിച്ചത്. തീവ്രമായ സബാര്‍ട്ടന്‍ യുക്തിക്ക് കേരളത്തിലെ മീഡിയയില്‍ ഇടം കിട്ടുന്നത് 'മാധ്യമ'ത്തിലൂടെയാണെന്ന് രണ്ട് ദശകം പൂര്‍ത്തീകരിക്കുന്ന ആ പത്രത്തിന്റെ ചരിത്രപരമായ സാന്നിധ്യം പരിശോധിച്ചാല്‍ മനസ്സിലാകും. പ്രചാര വിപ്ലവമല്ല, വാര്‍ത്താ ഉള്ളടക്കത്തിന്റെ പുതിയ മേച്ചില്‍പുറങ്ങള്‍ 'മാധ്യമം' ദിനപത്രം അവതരിപ്പിച്ചു. ഒരു വാര്‍ത്തയും കണ്ടില്ലെന്ന് നടിക്കാനാകാത്ത സമ്മര്‍ദത്തിലേക്ക് ഇതര മുഖ്യധാരാ മാധ്യമങ്ങളെ ഈ മാറ്റം കൊണ്ടുചെന്നെത്തിച്ചു ".(പച്ചക്കുതിര മാസിക ,ജനുവരി 2008 ) മാതൃഭൂമി  ആഴ്ചപ്പതിപ്പിന്റെ സഹ പത്രാധിപരായ കമല്‍റാം സജീവ്‌ മാധ്യമം പത്രത്തെ കുറിച്ച് എഴുതിയ വരികളാണിത്. ജമാഅത്തെ ഇസ്ലാമിയുടെ പ്രാദേശിക പ്രവര്‍ത്തകരും നേതാക്കളും ഒക്കെ തെല്ലു അഹങ്കാരത്തോടെ ഇതൊക്കെ ഏറ്റുപിടിക്കാറുമുണ്ട്. എന്നിട്ടും മറ്റെല്ലാ പത്രങ്ങളെയും പോലെ മുതലാളിത്തം തീര്‍ത്ത നീരാളി വലയത്തിനുള്ളില്‍ മാധ്യമം വീഴുന്നത് കാണുമ്പോള്‍ ഈ പാവങ്ങള്‍ വിരല്‍ കടിക്കുകയല്ലാതെ മറ്റെന്തു ചെയ്യും.
ഈസ്റ്റെണ്‍ കറിപ്പൌടരില്‍ മാരകമായ വിഷാംശം കലര്‍ന്ന വാര്‍ത്ത അപ്പാടെ വിഴുങ്ങുക വഴി മാധ്യമം അതിന്റെ പരസ്യ ധര്‍മ്മവും നിറവേറ്റി വഴിത്തിരിവായ ഘട്ടത്തിലാണ് നമ്മള്‍ മാമാങ്കത്തിന് പോകുന്നത്, കോട്ടയത്ത് മുമ്പ് ജമാഅത്തെ ഇസ്ലാമി വക കെട്ടിടത്തില്‍ നടന്ന ഫാഷന്‍ ഷോ യുടെ വാര്‍ത്തയോ, മലപ്പുറത്ത് മുമ്പുണ്ടായ ഓര്‍ക്കിഡ് വിപ്ലവമോ, പ്രസ്ഥാനത്തിന്റെ പള്ളിക്കും, സ്ഥാപനങ്ങള്‍ക്കും വേണ്ടി ജലസ്രോതസ്സുകള്‍ മണ്ണിട്ട്‌ മൂടിയ വാര്തകളടക്കം സ്വയം കണ്ണടച്ചാല്‍ മൂടി വെക്കാമെന്നു ധരിച്ചവരാണിവര്‍. ഇതര പ്രസ്ഥാനങ്ങളുടെ അകത്തളങ്ങളിലേക്ക് കണ്ണും, കാതും, മൂക്കും  കൂര്‍പ്പിച്ചു വെച്ചവര്‍ സ്വയം ചെന്ന് ചാടിയ ദുര്‍ഗതി തിരൂരിലെ മമാങ്കത്തിലെത്തി നില്‍ക്കുന്നു എന്ന് മാത്രം. തൊട്ടപ്പുറത്ത് മറ്റൊരു യുവജന സംഘടനയായ ഐ എസ് എമ്മിന് കീഴില്‍ ഇസ്ലാമിനെ പരിചയപ്പെടുത്താന്‍ വേണ്ടി മാത്രം ഒരെക്സിബിഷന്‍ നടക്കുമ്പോള്‍ അതിനെ ഹൈജാക്ക് ചെയ്യാന്‍ കൂടിയായിരുന്നു ഈ സംഗീത നൃത്ത ഹാസ്യ മേളയെന്ന് കൂടി ചേര്‍ത്തു വായിക്കണം.
'വഞ്ചനാത്മകമായ വര്‍ത്തമാനങ്ങള്‍ വിലയ്ക്കുവാങ്ങി കൊണ്ടുവരുന്ന ചില മനുഷ്യരുണ്ട്; ഒരു വിവരവുമില്ലാതെ ദൈവിക മാര്‍ഗത്തില്‍നിന്ന് ജനത്തെ വ്യതിചലിപ്പിക്കുന്നതിനും ഈ മാര്‍ഗത്തിലേക്കുള്ള പ്രബോധനത്തെ പരിഹസിക്കുന്നതിനും വേണ്ടി… അത്തരമാളുകള്‍ക്കുള്ളത് അവരെ അത്യധികം നിന്ദിതരാക്കുന്ന ശിക്ഷയത്രെ. (ഖുര്‍ആന്‍)
അബ്ദുല്ലാഹിബ്നു മുബാറക് , ഇമാം മാലിക് എന്നിവരെ അവലംബിച്ച് അനസി(റ)ല്‍നിന്ന് ഉദ്ധരിക്കുന്നു: നബി (സ) പ്രസ്താവിച്ചു: വല്ലവനും ഒരു ഗായികയുടെ സദസ്സിലിരിക്കുകയും അവളുടെ പാട്ട് കേള്‍ക്കുകയും ചെയ്താല്‍ പുനരുത്ഥാന നാളില്‍ അയാളുടെ കാതുകളില്‍ ഈയം ഉരുക്കിയൊഴിക്കപ്പെടുന്നതാണ്.(ഹദീസ്)

പിന്‍ കുറി: മാധ്യമം ഡിസംബര്‍ ഫെസ്റ്റ് എന്നത് മാധ്യമം ഡിസംബര്‍ ടെസ്റ്റ്‌ എന്നും വായിക്കാവുന്നതാണ്..ഈ ടെസ്റ്റിന്റെ ഫലം നോക്കീട്ടു വേണം ഇനിയും ഇത്തരം ഫെസ്റ്റുകള്‍ നാട് നീളെ സംഘടിപ്പിക്കാന്‍...ഹാ എല്ലാ 'മാ' പത്രങ്ങളും ഒന്ന് വഴി മാറിക്കെ..ഞമ്മളൊന്നങ്ങട്ട് പോട്ടെ ...ന്ന്

2011 ഒക്‌ടോബർ 19

പൂരം കഴിഞ്ഞു വെടി പൊട്ടിക്കുന്ന സോളിഡാരുട്ടികള്‍

 മലബാറില്‍ ഒന്നുമില്ലത്രേ, എല്ലാം അങ്ങ് തിരുവിതാംകൂറുകാരും, കൊച്ചിക്കാരും അടിച്ചു മാറ്റിയെന്നാണ് നമ്മുടെ സോളിഡാരുട്ടികളുടെ പരിഭവം, പിറന്നു വീണിട്ടു പത്തു വയസ്സ് പോലും തികയാത്ത ഈ കുട്ടികളുടെ കരച്ചില്‍ കണ്ടാല്‍ ആരും കൂടെ കരഞ്ഞു പോകും, അത്രയ്ക്ക് വലുപ്പത്തിലുള്ള പോസ്ടെറിലാണ് മലബാറിന്റെ കുറവുകള്‍ അക്കമിട്ടു നിരത്തിയിരിക്കുന്നത്, കാണുമ്പോള്‍ ആരും ഒരു നിമിഷമെങ്കിലും നിന്ന് നോക്കിപ്പോകും, വികസന രംഗത്തെ മലബാറിന്റെ പിന്നോക്കാവസ്ഥയെ കുറിച്ച് ആരും ആശ്ചര്യപ്പെട്ടു പോകും, മലബാറില്‍ നിന്നും ജയിച്ചു വിമാനവും തീവണ്ടിയും ഒക്കെ കയറിപ്പോകുന്ന ജനപ്രതിനിധികളെ ആരും രണ്ടു വാക്ക് ശപിക്കുകയും ചെയ്യും.. പക്ഷെ മലബാര്‍ എന്ന പിന്നോക്ക ന്യുനപക്ഷ പ്രദേശം കേരള മണ്ണില്‍ പിച്ച വെക്കാന്‍ തുടങ്ങുമ്പോള്‍ സോളിടാരുട്ടിയുടെ ബാപ്പ-പ്പാപ്പമാരും, എളാപ്പ മൂതാപ്പമാരും  എന്തെടുക്കുകയായിരുന്നു എന്ന് മാത്രം ചോദിക്കരുത്, അങ്ങോട്ട്‌ ചോദ്യങ്ങള്‍ ചോദിക്കാന്‍ ഇത് എം എം അക്ബര്‍ സാഹിബിന്റെ പരിപാടിയൊന്നുമല്ലല്ലോ..  അവര്‍   പറയുന്നത്  എന്തും റേഡിയോയില്‍ നിന്നെന്ന പോലെ നമ്മളൊക്കെ കേട്ട് കൊണ്ടിരിക്കുക, അതാണ്‌ അവര്‍ക്ക് ഏറെ ഇഷ്ടം, അതല്ല ചോദിക്കാന്‍ തന്നെയാണ് ഭാവമെങ്കില്‍ അവരെയൊക്കെ വഴിത്തിരിവ് പത്രത്തില്‍ ഇട്ടു നിറുത്തിപ്പൊരിക്കും സൂക്ഷിച്ചോ.

 സോളിടാരുട്ടികള്‍ക്ക് എപ്പോഴും പണി വേണം, ആ കിനാലൂരിലെ അടി കിട്ടിയ ശേഷം പിന്നെ പഞ്ചായത്ത് തെരഞ്ഞെടുപ്പു പ്രഖ്യാപിച്ചപ്പോളാണ്  എണീറ്റത്, സ്ത്രീ ശാക്തീകരണത്തിന് വേണ്ടി കേരള വനിതാ സമ്മേളനം നടന്നപ്പോള്‍ ചാനലായ ചാനലൊക്കെയും  ലൈവ് കൊടുത്തതും, പത്രങ്ങള്‍ വെണ്ടയ്ക്ക നിരത്തിയതും കണ്ടപ്പോള്‍ ഹിറാ സെന്ററില്‍ വീണ്ടും ചന്ദ്രനുദിച്ചതായിരുന്നു, രണ്ടു ലക്ഷം വനിതകള്‍ പങ്കെടുത്ത സമ്മേളനം നടത്തി മുസ്ലിം ലീഗിനെ ഒന്ന് വിറപ്പിച്ചാണ് ഇവര്‍ പഞ്ചായതാക്കാന്‍ ജനകീയ മുന്നണി  ഉണ്ടാക്കിയത്, പല ഹല്‍ഖാ അമീറുമാരും പഞ്ചായത്ത് പ്രസിടന്റിന്റെ കുപ്പായം വരെ തുന്നി വച്ചതായിരുന്നു, രുഖ്നുകളും, മുതഫിഖുകളും ഒക്കെ പഞ്ചായത്ത്‌ മെമ്പര്‍ സ്ഥാനം സ്വപ്നം കണ്ടു ആടും കോഴിയും, കിണറും, കക്കൂസും ഒക്കെ കൊടുത്തതിനു കണക്കില്ല, പലരും തങ്ങളുടെ വീട്ടു പടിക്കല്‍ മെമ്പറുടെ ആപ്പീസ് പോലും തുറന്നതായിരുന്നു.. എന്നിട്ടും, നമ്മുടെ കേരള ജനത പറ്റിച്ച പണി... ആ വനിതാ സമ്മേളനത്തിന് വന്ന പെണ്ണുങ്ങളും, അവരുടെ ഭര്‍ത്താക്കന്മാരും, അവരുടെ മക്കളും അവരുടെ കുടുംബങ്ങളും ഒക്കെ വോട്ടു ചെയ്തിട്ടും ഗ്രാമ ബ്ലോക്ക് ജില്ലാ പഞ്ചായത്തില്‍ ഒരാള്‍ തന്നെ ചെയ്ത മൂന്നു വോട്ടും കൂടി കൂട്ടി  ആകെ മൊത്തം ടോട്ടല്‍ ഒന്നര ലക്ഷം വോട്ടേ ഉള്ളൂ എന്ന് മാലോകര്‍ അറിഞ്ഞത് മിച്ചം..എനിക്കും മുതലാളിക്കും കൂടി ഒന്നര ലക്ഷം ശമ്പളം എന്ന് പറഞ്ഞു നടന്ന ഇക്കൂട്ടര്‍ക്ക്  എത്രയാണ് ശമ്പളം എന്ന് വേര്‍തിരിച്ചറിയാനായി...ഏതായാലും  പഞ്ചായത്ത് തെരഞ്ഞെടുപ്പില്‍ കേരളമാകെ കിട്ടിയ വോട്ടു കണ്ടു ബോധം കെട്ടതായിരുന്നു, പിന്നെ പൊന്തിയത് കഴിഞ്ഞ നിയമസഭ തെരഞ്ഞെടുപ്പു വേളയില്‍ ആലപ്പുഴ ഗസ്റ്റ് ഹൌസിലാണ്.അന്ന് പിണറായിയെ കെട്ടി പിടിച്ചു അന്തിയുറങ്ങിയതോടെ ജമാഅത്തെ ഇസ്ലാമിക്ക് വീണ്ടും തെരഞ്ഞെടുപ്പു രാഷ്ട്രീയത്തിന്റെ ഗര്‍ഭം ചുമക്കാനായി, മാധ്യമങ്ങളില്‍ വാര്‍ത്തകളില്‍ ഇടം പിടിക്കാനുമായി, കേരളത്തിലെ ഒരു നിയമസഭ മണ്ഡലത്തില്‍ ശരാശരി  ആയിരം വോട്ടു പോലും ഇല്ലാത്ത ഇക്കൂട്ടരെ കൂട്ട് പിടിച്ചത് കൊണ്ടാവും എല്‍ ഡി എഫിന് പ്രതിപക്ഷത് ഇരിക്കാനായത്. അല്ലെങ്കിലും ഇവരെ കൂടെ കൂട്ടിയതോടെ ഒട്ടകത്തിനു ഇടം കൊടുത്ത അറബിയുടെ അവസ്ഥയിലാണ് ഇടതു വിപ്ലവ മൂരാച്ചികള്‍. ഇടതു സംഘടനകള്‍ ഏറ്റെടുത്തിരുന്ന പരിസ്ഥിതി-വികസന പ്രശ്നങ്ങളൊക്കെയും മുഷ്ടി ചുരുട്ടി ഏറ്റെടുക്കുന്ന പണിയാണ് ഇപ്പോള്‍ സോളിടാരുട്ടികള്‍ക്ക്. 

നിയമസഭാ മാമാങ്കം കഴിഞ്ഞിട്ട് ആറ്‌ മാസമായി, കാര്യമായി പണിയൊന്നും ഇല്ലാതെ ഹിറാ സെന്ററില്‍ ഇരിക്കുമ്പോഴാണ് മലബാറിനെ ഒന്ന് നിവര്താനുള്ള ഈ പുതിയ വഹയ് ഇറങ്ങുന്നത്, മലബാറില്‍ ആകെയുള്ള കേരള ജനസംഖ്യയുടെ 42 ശതമാനം ജീവിക്കുന്നു, ജനസംഖ്യാനുപാതികമായി ഇവിടേയ്ക്ക് വികസനം എത്തിയില്ല എന്നാണു പുതിയ പരാതി, തിരുകൊച്ചിയില്‍ 130 ആര്‍ട്സ് & സയന്‍സ് കോളേജുകള്‍ ഉള്ളപ്പോള്‍ മലബാറില്‍ ആകെ 60 എണ്ണം മാത്രമേയുള്ളൂ, തിരുകൊച്ചിയില്‍ 4 സര്‍ക്കാര്‍ മെഡിക്കല്‍ കോളേജുകള്‍ ഉള്ളപ്പോള്‍ മലബാറില്‍ ഒന്ന് മാത്രം, 41 താലൂക്കുകള്‍ തിരു-കൊച്ചിയില്‍ ഉള്ളപ്പോള്‍ മലബാറില്‍ 22 എണ്ണം മാത്രം ഇങ്ങനെ പോകുന്നു കണക്കുകള്‍, നരേന്ദ്രന്‍ കമ്മീഷന്‍ റിപ്പോര്‍ട്ട് നടപ്പാക്കാന്‍ വേണ്ടി നമ്മുടെ എന്‍ ഡി എഫിന്റെ ഏറുപടക്കങ്ങള്‍ മുമ്പ് ഇത് പോലെ കണക്കുകള്‍ നിരത്തി ഒരു പോസ്റ്റര്‍ ഇറക്കിയിരുന്നു. ബാക്ക് ലോഗ് നികത്തണം എന്ന് പറഞ്ഞു അന്ന് ഈ സോളിടാരുട്ടികള്‍ മാര്‍ച്ചും ധര്‍ണയും ഒക്കെ സംഘടിപ്പിച്ചിരുന്നു. ഈ വിഷയത്തിലും നമുക്ക് റാലിയും ധര്‍ണ്ണയും ഒക്കെ പ്രതീക്ഷിക്കാം, കാരണം അതൊന്നുമില്ലാതെ എന്ത് ആഘോഷം അല്ലെ..

തിരുവിതാംകൂറില്‍ ഒരു കോളേജ് ഉണ്ടായി നൂറു കൊല്ലം പിന്നിട്ടിട്ടാണ് മലബാറില്‍ ഒരു ഫാറൂഖ് കോളേജ് ഉണ്ടാകുന്നത്, പഠിക്കാന്‍ ആളില്ലാതെ കോളേജ് തുറന്നിട്ടിട്ടു എന്ത് കാര്യം..അക്കാലത്ത് സ്കൂളും കോളേജും ഒക്കെ ഗവര്‍മെന്റ് അനുവദിച്ചാല്‍ തന്നെ ഏറ്റെടുക്കാന്‍ സമുദായ നേതൃത്വം തയ്യാറായിരുന്നില്ലെന്നു  ചരിത്ര രേഖകള്‍ സാക് ഷ്യപ്പെടുത്തുന്നു. 70 കളില്‍ പോലും മലബാറിലേക്ക് അനുവദിക്കപ്പെട്ട പല സ്കൂളുകളും ഏറ്റെടുക്കാന്‍ സമസ്ത അടക്കമുള്ള  സംഘടനകള്‍ വൈമനസ്യം  കാണിച്ചിരുന്നതായും കാണാം. അത്തരം സ്കൂളുകളൊക്കെ ഏറ്റെടുത്തവര്‍ക്ക്  സമുദായത്തിനകത്ത്‌ കല്ലേറും കയ്യൂക്കും സഹിക്കേണ്ടി  വന്നെങ്കിലും മുന്നേറ്റമുണ്ടായി. വിദ്യാഭ്യാസ രംഗത്തോട് പുറം തിരിഞ്ഞു നിന്നിരുന്ന സമുദായത്തെ ശക്തമായ ബോധവല്കരണം നടത്തി സ്കൂളിലേക്കും, കോളേജിലേക്കും എത്തിക്കാന്‍ കേരള നദുവതുല്‍ മുജാഹിദീനും മുസ്ലിം ലീഗും കൈകോര്‍ത്തു പ്രവര്‍ത്തിച്ചു.   അതിനു ശേഷമാണ് മംപാട്ടും, തിരൂരങ്ങാടിയിലും, കൊണ്ടോട്ടിയിലും, പെരിന്തല്‍മണ്ണയിലും ഒക്കെ കോളേജുകള്‍ ഉണ്ടാകുന്നത്, ഈ കോളേജുകള്‍ക്ക് ഒക്കെ പിന്നില്‍ മുസ്ലിം ലീഗും, മുജാഹിദ് നേതാക്കളും ആണ്  വിയര്‍പ്പോഴുക്കിയത് എങ്കില്‍ ഈ സോളിടാരുട്ടികളുടെ ബാപ്പ-പ്പാപ്പക്കും, എളാപ്പ മൂതാപ്പാക്കും അന്ന് കലാലയങ്ങളെ കൊലാലയങ്ങള്‍ ആക്കുന്ന പണിയായിരുന്നു.
ഭരണമില്ലാത്ത ദീന്‍ സങ്കല്പത്തിലെ വീട് പോലെയായതിനാലും, ബ്രിടീഷുകാരെന്ന ലാത്ത പോയി വന്ന മനാതമാരുടെ ഈ ഇന്ത്യാ രാജ്യത്തെ വായു പോലും മുസല്‍മാനു ഹറാം ആയതിനാലും,ഒരു മുതഫിഖ് സര്‍ക്കാര്‍ ജോലി എങ്ങനെ സ്വീകരിക്കും, സര്‍ക്കാര്‍ സ്കൂളിലോ കോളെജിലോ എങ്ങനെ പഠിക്കും, തെരഞ്ഞെടുപ്പുകളില്‍ എങ്ങനെ വോട്ടു ചെയ്യും, ജമാഅത്തെ ഇസ്ലാമി തീര്‍ത്ത ഈ വേലികെട്ടിനുള്ളില്‍ കിടന്നു ഇസ്ലാമിക രാഷ്ട്രം സ്വപ്നം കണ്ട പലരും തങ്ങളുടെ സര്ടിഫിക്കട്ടുകള്‍ പോലും കീറിയിട്ടിട്ടുന്ടെന്നു പില്‍കാലത്ത് ജമാഅതില്‍ നിന്നും ജയില്‍  ചാടി വന്ന പലരും വെളിപ്പെടുതിയപ്പോഴും കേരളത്തില്‍ മലബാര്‍ എന്ന പ്രദേശം മുസ്ലിം ലീഗിന്റെ കൈ പിടിച്ചു  പിച്ച വെച്ച് തുടങ്ങുകയായിരുന്നു. 

ആകെ 64 കേന്ദ്ര സംസ്ഥാന പൊതു മേഖല സ്ഥാപനങ്ങള്‍ തിരു കൊച്ചിയില്‍ ഉള്ളപ്പോള്‍ മലബാറില്‍ 19 എണ്ണം മാത്രം, കെ എസ് ആര്‍ ടി സി യുടെ 67 ഡിപ്പോകള്‍ തിരു കൊച്ചിയിലെങ്കില്‍ മലബാറില്‍ 19 എണ്ണം മാത്രം, 68 എന്ജിനീയറിംഗ് കോളേജുകള്‍ തിരു കൊച്ചിയിലും 18 എണ്ണം മാത്രം മലബാറിലും അങ്ങനെ പോകുന്നു കണക്കുകള്‍.. ഇവരീ കണക്കു പറഞ്ഞതൊക്കെ സര്‍ക്കാര്‍ സ്ഥാപനങ്ങളോ, സര്‍ക്കാര്‍ സംരംഭങ്ങളോ ആണെന്നിരിക്കെ ഈ പിന്നോക്കാവസ്ഥയുടെ പ്രധാന കാരണക്കാരും ഇവര്‍ തന്നെയാണെന്ന് ചരിത്രം നമ്മെ ഓര്‍മ്മപ്പെടുത്തുന്നു. ഇവരന്നു പഠിക്കാന്‍ അനുവദിച്ചിരുന്നെങ്കില്‍, ഇന്ന് കോളേജുകളുടെ എണ്ണം പറഞ്ഞു കരയേണ്ടി വരുമായിരുന്നില്ല. ഇവര്‍ അന്ന് തെരഞ്ഞെടുപ്പു പ്രക്രിയയില്‍ പങ്കാളികള്‍ ആയിരുന്നെങ്കില്‍ മലബാറിന്റെ പിന്നോകാവസ്ഥ അന്നേ പരിഹരിക്കാമായിരുന്നു, ഇവര്‍ സര്‍ക്കാര്‍ ജോലി സ്വീകരിച്ചിരുന്നെങ്കില്‍ ബാക്ക് ലോഗ് നികത്താന്‍ ഒരു സമരവും വേണ്ടി വരില്ലായിരുന്നു.
മലബാറിനെ നിവര്‍ത്താന്‍  ഇനിയോരുഗ്രന്‍ സമരം ചിലപ്പോള്‍ കേരളം കണ്ടേക്കാം, കാരണം എക്സ്പ്രെസ്സ് ഹൈവേക്ക് എതിരെ മുദ്രാവാക്യം വിളിച്ചാണ് ഈ കുട്ടികള്‍ പെറ്റു വീണത്‌, കേരളത്തില്‍ എട്ടുവരിപ്പാതയെ കുറിച്ച് ചര്‍ച്ച വന്നപ്പോഴേക്കും ഉള്ള ദേശീയ പാത നാലുവരിയാക്കി വികസിപ്പിച്ചാല്‍ മതിയെന്ന് പറഞ്ഞു കൊടിയെടുതവരായിരുന്നു സോളിടാരുട്ടികള്‍.പിന്നെ ദേശീയ പാത നാലുവരിയാക്കാന്‍ സര്‍വേ നടക്കുമ്പോള്‍ സര്‍വെകാരെ തടയാനും മുഷ്ടി ചുരുട്ടാനും ഇവര്‍ തന്നെ മുമ്പിലുണ്ടായിരുന്നു. ദേശീയ പാതക്കെതിരെ സമരം ചെയ്ത ഇതേ കുട്ടികള്‍ തന്നെ നിലമ്പൂരില്‍ നിന്നും നന്ജംകൊട്ടെക്ക് റെയില്‍ പാത വേണമെന്ന് പറഞ്ഞു മുമ്പ് പാലക്കാട്ടെ റെയില്‍വേ ഡിവിഷന്‍ ആപ്പീസിലേക്ക് മാര്‍ച്ച് നടത്തിയിരുന്നു, താനൂര്‍- ഗുരുവായൂര്‍ പാതക്ക് വേണ്ടിയും നടത്തി ഇത് പോലെ സമര നാടകങ്ങള്‍. റോഡു കൊണ്ടാണോ, റെയില്‍ കൊണ്ടാണോ ജനങ്ങള്‍ക്ക്‌ ഉപകാരവും, ഉപദ്രവവും എന്ന് ചിന്തിക്കാന്‍ ലക്കോട്ടിനു ഒട്ടിക്കാനുള്ള ചോറെങ്കിലും തലയില്‍ ഉണ്ടായാല്‍ മതി, അതില്ലാത്തത് കൊണ്ടാണ് തൃശൂര്‍ പൂരം കഴിഞ്ഞതിനു ശേഷം വെടി പൊട്ടിക്കേണ്ടി വരുന്നത് സോളിടാരുട്ടീ.....
കല്ലുപ്പ് നിരോധനത്തെ കുറിച്ച് ആലോചിച്ചപ്പോഴേക്കും കൊടിയെടുത്തു വന്നു പരപ്പനങ്ങാടി കടപ്പുറതെക്ക് .. അവിടെ കല്ലുപ്പ് കുറുക്കലായിരുന്നു മുഖ്യ അജണ്ട, സ്വാതന്ത്ര്യ സമര സേനാനി അസനാര്‍ കുട്ടി സാഹിബ് പരിപാടി ഉത്ഘാടനം ചെയ്ത ശേഷം പ്രമുഖ ചരിത്രകാരന്‍ ഡോ.എം ഗംഗാധരന്റെ പ്രസംഗമായിരുന്നു, കല്ലുപ്പ് ആരോഗ്യത്തിന് ഹാനികരമാണെന്നും ഗോയിറ്റര്‍ പോലുള്ള രോഗങ്ങള്‍ തീരദേശ മേഖലയില്‍ വ്യാപകമാണെന്നിരിക്കെ  അയഡിന്‍ ചേര്‍ത്ത ഉപ്പാണ് നല്ലതെന്നും അദ്ദേഹം പറഞ്ഞപ്പോഴാണ് സോളിടാരുട്ടികള്‍ക്ക് നേരം വെളുക്കുന്നത്‌, പിന്നീട് എവിടെയും ഉപ്പു കുറുക്കാന്‍ പോയിട്ടില്ല ഇവര്‍. സ്വാതന്ത്ര്യ സമരത്തിന്‌  ആയിരം വട്ടം ശാപം എന്ന് പറഞ്ഞു നടന്നവരാണ് ഉപ്പു കുറുക്കാനും, നിവര്‍ത്തന പ്രക്ഷോഭത്തിനും ഇപ്പോള്‍ രംഗത്ത്‌ വരുന്നതെന്ന് ആരെങ്കിലും പറഞ്ഞാല്‍ ഹാ സൂക്ഷിച്ചോ മാധ്യമം ഉണ്ട് കയ്യില്‍.. മറക്കണ്ടാ..നിങ്ങളുടെ ഒക്കെ ഉള്ളുകള്ളികള്‍ ചോര്‍ത്തിയെടുത്തു വാര്‍ത്തയും , പരമ്പരയും ഉണ്ടാക്കും ഹാ...

പിന്‍ വായന:  പ്രസ്ഥാന നേതാക്കളുടെ അഴിമതിയും,  കോട്ടയത്തെ ജമാഅത്തെ ഇസ്ലാമി വക കെട്ടിടവുമായി ബന്ധപ്പെട്ട വാര്‍ത്തയും ഒക്കെ വഴിത്തിരിവ് കാണാതെ പോയത് ആരും ചോദിക്കരുത്.. അതായതു കഴുകന്‍ എല്ലാവരുടെയും ഇറച്ചി തിന്നും, കഴുകന്റെ  ഇറച്ചി ആരും തിന്നാനോ തൊടാനോ പാടില്ല...